വാക്ക്

ഒരു വാക്കെന്നെത്തന്നെ നോക്കുന്നു.

കണ്ണാടിയില്‍ മുഖം നോക്കുമ്പോഴാണ്

അത് കണ്ടത്.

*

ഒരു വാക്കെന്നിലേക്ക് നടക്കുന്നു.

രാവിലെയുള്ള നടത്തക്കിടയിലാണ്

അത് മനസ്സിലാക്കിയത്.

*

ഒരു വാക്കെന്നോടെന്തോ പറയുന്നു.

പ്രാര്‍ഥനക്കിടയിലാണ്

അങ്ങനെ തോന്നിയത്.

*

ഒരു വാക്കെന്നെ പിന്തുടരുന്നു.

അപ്പോള്‍ ഞാനും ആരെയോ

പിന്തുടരുകയായിരുന്നു.

*

ഒരു വാക്കെന്നോട് ചിരിക്കുന്നു.

ആ നേരത്ത് ഞാനും കാരണമില്ലാതെ

ചിരിക്കുകയായിരുന്നു.

*

ഒരു വാക്കെന്നിലൂടെ നടക്കുന്നു.

ഉറങ്ങുന്നതിനു മുന്‍പുള്ള ആലസ്യവേളയില്‍

അങ്ങനെ സംഭവിച്ചു.

*

ഒരു വാക്കെന്നില്‍ കിടന്നുറങ്ങുന്നു.

നിദ്രയിലെ സ്വപ്നത്തില്‍

ഞാന്‍ അതറിഞ്ഞു.

*

ഒരു വാക്കെന്നോടൊപ്പം ശയിക്കുന്നു.

ഉണര്‍ന്നെഴുന്നേറ്റപ്പോള്‍ 

കിടക്ക അത് പറഞ്ഞുതന്നു.

*

ഒരു വാക്കെന്നെ ചുംബിക്കുന്നു.

കുളത്തിന്‍റെ പടവുകളിലെ

ഏകാന്തസന്ധ്യ സാക്ഷി.

*

ഒരു വാക്കെന്നില്‍വീണു മരിക്കുന്നു.

എന്നെ കുത്തിയൊഴുക്കി

ഒരു പേമാരി തിമിര്‍ക്കുന്നു.

**