തങ്കമണി
തങ്കമണിയെ അറിയാമോ?
കിള്ളിപ്പാലത്തായിരുന്നു താമസം.
വാറ്റുചാരായം വില്ക്കലായിരുന്നു ജോലി.
*
പഴയ കാലം.
പഴയ വഴികള്.
സ്വകാര്യതപോലെ കുറ്റിക്കാടുകള്.
അവയ്ക്കിടയില് തങ്കമണി.
വാറ്റുചാരായത്തിന്റെ കുപ്പികള്.
*
ചിലപ്പോള് എക്സൈസുകാര് വരും.
ചില ദിവസങ്ങളില് ആരും വരില്ല.
മാസാവസാനങ്ങളില് ഓഫീസുകളിലെ സാറന്മാര്.
സ്കൂള് കട്ട് ചെയ്തു വരുന്ന കുട്ടികള്.
പലതരം ഇടപാടുകള്.
*
മക്കളുടെ ചെലവ്...
ഭര്ത്താവിന്റെ. ആവശ്യങ്ങള്...
പഴയ ഇടപാടുകാരുടെ
പഴകാത്ത ആവശ്യങ്ങള്.
തങ്കമണിക്ക് തിരക്കാണ്.
*
വഴക്കില്ലാത്ത ദിവസമില്ല.
തലതെറിച്ച മക്കള്.
പണിയെടുക്കാത്ത കെട്ടിയവന്.
കടം പറയുന്ന ഇടപാടുകാര്.
അടിവസ്ത്രം പിളര്ക്കുന്ന നോട്ടങ്ങള്.
*
മനുഷ്യത്തിയല്ലേ?
എങ്ങനെ എപ്പോഴും സഹിക്കും.
വഴക്കടിക്കുമ്പോള് തങ്കമണി എല്ലാം മറക്കും.
പുഴയിലെ വെള്ളംപോലെ അവള് ഒഴുകും.
*
എക്സൈസുകാര് കുപ്പികള് പൊട്ടിക്കും.
അട്ടഹസിക്കും.
പോലീസ് സ്റ്റേഷനില് കൊണ്ടുപോകും.
ഭര്ത്താവ് തലമുടിയില് ചുറ്റിപ്പിടിക്കും.
മക്കള് കണ്ണുപൊട്ടുന്ന തെറി വിളിക്കും.
ഇടപാടുകാര് അധികാരത്തോടെ
അവിടെയും ഇവിടെയും പിടിക്കും.
പുഴയിലെ വെള്ളംപോലെ അവള് ഒഴുകും.
*
എക്സൈസുകാരെപ്പേടിച്ച് ഓടിയതാണ്.
റെയില്പ്പാളത്തിലൂടെ
അവള് ഓടുന്നതറിയാതെ
തീവണ്ടി വന്നു.
ചുവട്ടില് അവള് ഞെരിയുന്നതറിയാതെ
തീവണ്ടി പോയി.
*
തങ്കമണി മരിച്ചു.
ചോര വലുതായൊന്നും തെറിച്ചില്ല.
ആരോ പഴയൊരു തുണികൊണ്ട് മൂടി.
കുറേനേരം അവിടെ കിടന്നു.
അടുത്ത തീവണ്ടി വരുന്നതിനുമുന്പ്
റെയില്വേക്കാര് അത് മാറ്റിക്കിടത്തി.
റെയില്പ്പാളത്തിനരികില്
അവള് പിന്നെയും കിടന്നു.
തങ്കമണി മരിച്ചു.
**
Comments