പിന്നെയും

പിന്നെയും ചുംബിക്കുമ്പോള്‍

പകലായിരുന്നോ രാത്രിയോ,

അതോ സന്ധ്യയോ?

ചുണ്ടുകള്‍ അത്ര ആര്‍ദ്രമല്ല.

മുഖം മസൃണവുമല്ല.

എങ്കിലും പൂങ്കാറ്റ് ഉണ്ടായിരുന്നു.

പക്ഷികള്‍ പാടുന്നുണ്ടായിരുന്നു.

വാതില്‍പ്പാളി മെല്ലെ ആടിക്കൊണ്ടിരുന്നു.

കിടക്കയിലെ ചുളിവുകള്‍ നിവര്‍ന്നു. .

പിന്നെയും ചുംബിച്ചപ്പോള്‍

പണ്ടത്തെപ്പോലെ വിരലുകള്‍ വിറച്ചില്ല.

മെല്ലെ ആ തലമുടി തഴുകിയെന്നു മാത്രം.

പെട്ടെന്ന്‍ മൊബൈല്‍ ഒച്ചവച്ചു;

വലിയ ശബ്ദത്തില്‍.

അങ്ങനെ ആ ചുംബനം അവസാനിച്ചു.

ആരും അറിയാതെ, 

ആരോടും ഒന്നും പറയാതെ.

പിന്നെയും കുറച്ചുനേരം കൂടി

ഒരുകാറ്റ് തിരശ്ശീലയില്‍ വട്ടം ചുറ്റി.

ഒരു കുരുവി മുറ്റത്ത് തത്തിക്കളിച്ചു.

ക്രമേണ എല്ലാം മാഞ്ഞുപോയി.